Háskóli Íslands

Rannsóknarsetur um fólksflutninga og fjölmenningu

Á síðastliðnum ártugum hafa málefni sem tengjast auknum fólksflutningum af margvíslegu tagi og aukinni félagslegri margbreytni verið ofarlega á baugi í alþjóðlegu fræðastarfi. Eins og annars staðar í heiminum hefur íslenskt samfélag gengið í gegnum breytingar af þessum toga sem hafa markað djúp spor í samfélagsumræðu íslensks samtíma og hafa þessar breytingar á síðastliðnum árum verið skoðaðar í auknum mæli af íslensku fræðifólki. Markmið Rannsóknarsetursins er að stuðla að, hvetja og kynna rannsóknir á málefnum tengdum fjölmenningu, innflytjendum og farandverkafólki, og jafnframt tengdum málefnum svo sem þjóðerni, kynþáttahyggju, samlögun og samþættingu. Þessi málefni eru skoðuð í alþjóðlegu og staðbundnu samhengi. Rannsóknarsetrið leggur áherslu á þverfaglega nálgun og samstarf við önnur rannsóknarsetur og stofnanir sem vinna að svipuðum málefnum. Það leitast sértaklega við að gera rannsóknir kennara og nemanda við Háskóla Íslands á þessum sviðum sýnilegar og stuðla að samstarfi við aðrar stofnanir utan hans.

Nánar um markmið:
 
eiga frumkvæði að og sinna rannsóknum
 
sinna rannsóknartengdum þjónustuverkefnum
 
efla tengsl rannsókna og kennslu á sviði fjölmenningar, fólksflutninga og innflytjendamála.
 
hafa samstarf innan Háskóla Íslands og við aðrar innlendar og erlendar rannsóknastofnanir og fræðimenn á rannsóknasviði setursins
 
veita nemendum þjálfun og reynslu í vísindalegum vinnubrögðum með því að gefa þeim kost á að vinna rannsóknarstörf á vegum setursins eftir því sem unnt er
 
kynna niðurstöður rannsókna m.a. með útgáfu fræðibóka og -greina, gangast fyrir fræðilegum námskeiðum, fyrirlestrum, málþingum og ráðstefnum
 
vera ráðgefandi og taka þátt í almennri umræðu um þessi og tengd málefni í samfélaginu
 
 
 
 
Að rannsóknarsetrinu standa fræðimenn úr Háskóla Íslands sem hafa stundað fjölþættar rannsóknir á sviði fjölmenningar og fólksflutninga.
 
 
 
 
Unnur Dís Skaptadóttir, prófessor í mannfræði, hefur unnið að rannsóknum um reynslu og viðhorf ólíkra hópa fólks sem flust hafa til Íslands vegna starfa á síðustu áratugum og skoðað mótun fjölmenningarlegs samfélags.
 
Kristín Loftsdóttir, prófessor í mannfræði, hefur rannsakað WoDaaBe farandverkamenn í Níger, fjölmenningu í íslenskum námsbókum og kynþáttahyggju í íslensku samhengi.
 
Kristín Erla Harðardóttir, doktorsnemi í mannfræði, aðjúnkt mannfræðiskor og framkvæmdastjóri Mannfræðistofnunar hefur gert margvíslegar rannsóknir fyrir hönd Félagsvísindastofnunar HÍ um atvinnuþátttöku fólks af erlendum uppruna, stöðu flóttamanna og þátttöku þeirra í íslensku samfélagi.

 

Þú ert að nota: brimir.rhi.hi.is